វចនានុក្រមខ្មែរ២០២២

 វចនានុក្រមខ្មែរ២០២២




អំពីយើង (កម្មវិធីជំនាន់ទី ២)

ក្រុមប្រឹក្សា​ជាតិ​ភាសាខ្មែរ​នៃ​រាជបណ្ឌិត្យ​សភាកម្ពុជា ជា​ស្ថាប័ន​ជាតិ​ដែល​បង្កើត​ឡើង ដើម្បី​អភិរក្ស​និង​អភិវឌ្ឍភាសា​និង​អក្សរ​ខ្មែរ​ប្រកបដោយ​និរន្តរភាព​ព្រម​ទាំង​រក្សា​បាន​នូវ អត្ត​សញ្ញាណ​ជាតិខ្មែរ។

វចនានុក្រមខ្មែរ​ជាផ្លូវការ​ត្រូវបាន​បោះពុម្ព​ចំនួន​៥គ្រារួច​មក​ហើយ ក្នុង​នោះ​បោះពុម្ពគ្រាទី១ ឆ្នាំ១៩៣៨(ភាគ១)និង​ឆ្នាំ១៩៤៣(ភាគ២) បោះពុម្ពគ្រាទី២ ឆ្នាំ​១៩៥២(ភាគ២) បោះពុម្ពគ្រា​ទី៣ ឆ្នាំ១៩៥៨​(ភាគ១)​និង​ឆ្នាំ​១៩៦២​(ភាគ២) បោះពុម្ពគ្រាទី៤ ​ឆ្នាំ១៩៦២​(ភាគ១)​ និង​ បោះពុម្ពគ្រា​ ទី៥​ ឆ្នាំ១៩៦៧​(ភាគ១)​និង​ឆ្នាំ១៩៦៨​(ភាគ២)។ រយៈ​ពេល​៥៥ឆ្នាំ ​គិត​ចាប់ពីការ​បោះពុម្ព​ផ្សាយ វចនានុក្រម​ខ្មែរ​គ្រាទី៥ ក្នុង​ឆ្នាំ១៩៦៧ មកដល់​ឆ្នាំ២០២២ មាន​ពាក្យជា​ច្រើន​នៅមិន​ទាន់បំពេញ​បន្ថែម ក្នុង​វចនានុក្រម​ខ្មែរនៅឡើយ។​ ម្យ៉ាងទៀត​ នៅក្នុង​ស្ថានភាព​សង្គម​សេដ្ឋកិច្ច​បច្ចុប្បន្ន ដែល​មានការ រីកចម្រើន​លើវិស័យ​វិទ្យាសាស្ត្រ​និង​បច្ចេក​វិទ្យា​និង​ក្នុង​បរិបទ​សាកលភាវូប​នីយកម្ម គេត្រូវ​ការពាក្យជា ចាំបាច់​ដើម្បីប្រើប្រាស់ឱ្យស្រប​តាម​តម្រូវការសង្គម។

ពីឆ្នាំ២០១៨ ដល់ឆ្នាំ២០២២ ក្រុមប្រឹក្សាជាតិភាសាខ្មែរបានទទួលការឧបត្ថម្ភគាំទ្រទាំង ស្រុងពីរាជរដ្ឋាភិបាលនូវគម្រោងបច្ចុប្បន្នកម្មវចនានុក្រមខ្មែរ ដែលជាប្រវត្តិសាស្ត្រថ្មីមួយទៀតក្នុង វិស័យអក្សរសាស្ត្រជាតិ បន្ទាប់ពីការបង្កើតវចនានុក្រមខ្មែរលើកដំបូងនាឆ្នាំ១៩១៥ នាដើមសតវត្ស ទី២០។ គណៈកម្មា​ធិការ​ជាតិ​មួយ​ត្រូវបាន​បង្កើត​ឡើង​ក្នុង​ឆ្នាំ២០១៨ ក្នុង​គោល​បំណង​ធ្វើបច្ចុប្បន្នកម្ម និង​ទំនើប​កម្ម​វចនានុក្រម​ខ្មែរសម្រាប់សុខ​ដុមនីយកម្មក្នុង​ការប្រើភាសាខ្មែរ។

គណៈកម្មាធិការ​ជាតិរៀប​រៀង​វចនានុក្រម​ខ្មែរបាន​កំណត់គោលការណ៍​បច្ចេកទេស​ក្នុងការ​ធ្វើបច្ចុប្បន្នកម្ម ដែល​មានដូចជា​រក្សាទុក​ទម្រង់ដើម​នៃវចនានុក្រម​ខ្មែរដោយបានធ្វើការ​កែសម្រួល​ចំណុច មួយ​ចំនួន បន្ថែម​ពាក្យដែល​កំពុង​ប្រើប្រាស់​ហើយដែល​មិនទាន់មាន​នៅក្នុង​វចនានុក្រម​ខ្មែរ ដាក់ សូរអាន​គ្រប់មេពាក្យ​និងកូន​ពាក្យមួយ​ចំនួន ប្តូរថ្នាក់​ពាក្យដោយ​ត្រូវបាន​បែងចែក​ត្រឹមតែ៨ គឺនាម សព្វនាម កិរិយាសព្ទ គុណនាម គុណកិរិយា ធ្នាក់ ឈ្នាប់ ឧទានសព្ទ រួមទាំងបរិវារសព្ទជាដើម។

ស្រប​តាម​ការវិវត្តជឿន​លឿន​នៃវិទ្យាសាស្ត្រ​និង​ដើម្បីជំរុញ​ការ​ផ្សព្វផ្សាយ​ឱ្យបាន​ទូលំទូលាយ ដល់ស្រទាប់អ្នក​អាន​និងអ្នក​សិក្សា​ស្រាវជ្រាវភាសាខ្មែរ​នៅទូទាំង​ប្រទេស​និង​សកល​លោក ក្រុមប្រឹក្សាជាតិភាសាខ្មែរ​បាន​បង្កើត​ជាសុសវែរវចនានុក្រម​បច្ចុប្បន្នកម្ម គ្រាទី១ ដែល​ជា​ប្រព័ន្ធផ្សព្វផ្សាយ បែបថ្មីនិង​ពេញនិយម​ក្នុងពេលបច្ចុប្បន្ន។


ទាញយកកម្មវិធី




Comments